去旅行遊山玩水、吃喝玩樂當然Must-Have啦！但我自己嘅行程就一定包埋逛下當地啲文具店，就係咁早兩年去旅行時買咗個啱Feel嘅Pen Case返嚟，唔想冷落佢(笑)。而個Pen Case只放得落三支筆但我日常會用到四種筆：墨水筆(Fountain Pen)、原子筆(Ballpoint Pen)、走珠筆(Rollerball Pen)、鉛芯筆(Mechanical Pencil)，咁就自然有取捨嘅時候。通常情況下墨水筆會係膽，因為用佢寫字、簽名又靚又夠Chok，搭支走珠筆，加多支原子筆，足夠應付日常，遇到特別情況就會換入鉛芯筆，out走支走珠筆。
首先講一下墨水筆，墨水筆雖然寫字最靚，但墨水(Water Based Ink)乾得慢算係通病，而且墨水筆(尖)同墨水係頗挑紙，即係唔係每種紙都適合用墨水筆書寫。另外墨水筆仲有一個通病就係你拎出嚟用有時唔係第一筆就出到墨寫到字(有啲筆佢喺設計上係可以解決到呢個問題但暫且不述)，至於話墨水筆會容易漏墨問題，慶幸今時今日呢啲情況已大幅減少，但唔好彩遇到善後功夫都仲係幾頭痕！至於墨水筆要開筆蓋用反而問題不大，因為用開墨水筆嘅人早已習慣。如果想用起嚟方便啲，Capless款式係唔錯嘅選擇，不過Capless細筆尖同傳統大筆尖一比，寫感高下立見。
至於原子筆，算係穩陣之選，用起嚟快捷方便一按或一擰就寫得，又唔挑紙，呢個係油性墨水(Oil Based Ink)賦予嘅便利。原子筆係技術上係唔需要帶筆蓋，當然有部份原子筆係帶筆蓋的，之所以如此：一係為咗要設計簡單化壓縮成本；一係為咗要設計型仔Look。原子筆使用上最討厭當然係喺不為意下支芯勁漏墨，咁你件衫或個袋嘅下場通常會慘過墨水筆漏墨，原因係油性墨水比起水性墨水更難清潔。其實仲有一點原子筆不能完全頂替墨水筆同走珠筆就係原子筆係某啲情況/場合下係唔可以用於簽署合同文件的(呢個頗為有趣問題有機會再同大家講講)。
最後講到走珠筆，走珠筆另有一個名叫簽字筆。顧名思義佢係適合你大筆一揮簽名用(合同文件)，呢方面同佢支筆芯係水性墨水(Water Based Ink)有關，亦係分別佢同原子筆嘅重要技術點。因為使用水性墨水關係通常支筆係會帶有筆蓋以阻慢墨水蒸發，同時亦避免支筆芯因刮碰造成損壞，事關90%以上嘅走珠筆唔似得原子筆可以一按一擰就收埋支芯。所以單憑外觀係好難分辨支筆究竟係墨水筆定走珠筆，亦因為望落似墨水筆所以俾人感覺佢又偏Elegance啲更見得人。不過帶筆蓋嘅筆有啲人就唔多鍾意用，一來覺得唔方便，二來唔見咗個筆蓋支筆就等同半廢甚或報廢，不過今天已經有所謂Capless或Non-Dry型號筆芯，並衍生有原子筆樣嘅走珠筆面世，當然冇咗個蓋，個Look又會downgrade咗。另外值得一提係走珠筆同原子筆一樣，用晒冇墨就咁換支筆芯就可以令佢重生。講開筆芯有趣嘅係雖然走珠筆筆芯望落大支啲，但一般係唔夠原子筆筆芯寫得字多，所以換芯會換得密啲。至於走珠筆會唔會漏筆呢個問題⋯⋯ 我自己就未遇過喇！